Vital Aza

En casi toles époques hai personalidaes vinculaes de dalguna forma al Conceyu L.lena, figures que destacaron en delles facetes (militares, políticos, escritores, pintores, investigadores, músicos,...); bien por nacer o vivir temporaes equí o bien polos llazos familiares o afectivos.

Na Edá Meda yá se citen dellos personaxes que participaron en distintes guerres como, RAMIRO FERNÁNDEZ LOBO y HERNÁN PÑEREZ DEL PULGAR, al llau de los Reis Católicos na conquista de Granada; el capitán de navíu GONZALO BAYÓN na conquista de La Florida y JUAN DE LLANES nes campañes del Gran Capitán.

Félix, G. Nuevo

Nel sieglu XVIII destaca FRANCISCO ANTONIO BERNALDO DE QUIRÓS Y BENAVIDES, que lluchó al llau de Felipe V, pero sobre too tien de resaltase la so faceta lliteraria, posiblemente foi'l primer poeta de L.lena qu'escribió en llingua asturiana, y hasta'l propiu Feijoo alábalu. Si bien desconocemos si nació nel conceyu de L.lena, sí sabemos que vivió en La Pola, ente finales del sieglu XVII y entamos del XVIII. Solamente se conservó una mínima parte de la so obra recoyida en Poesías selectas en dialecto asturiano, Uviéu 1839.

Tamién hai que facer mención a FRANCISCO BERNALDO DE QUIRÓS Y BENAVIDES, escritor y políticu nacíu en La Pola a finales del sieglu XVIII, miembru de la Xunta Xeneral del Principáu y representante d'Olloniego y L.lena, sobre too en temes agropecuarios.

Hubo un grupu d'abondos l.lenizos, principalmente del Val.le del Güerna, que nos sieglos XIX y XX, sobresalieron na carrera eclesiástica, sobre too dominicos: ente los más conocíos cabe citar a: FERNANDO BLANCO LORENZO, obispu d'Ávila y Valladolid, el PADRE BARBADO, obispu de Salamanca, el PADRE RAMÓN SARABIA, el PADRE MANUEL SUÁREZ o el PADRE GAFO que llegó a ser diputáu de las Cortes na II República.

Nel campu de les lletres, hai una riestra de personalidaes destacaes como:

RAMÓN MENÉNDEZ PIDAL

Magar que nacera n'A Coruña, yera natural de Payares. Ilustre filólogu de reconocíu prestixu mundial tando la so figura siempre vinculada a L.lena. Asina en 1.946 inagurábase la biblioteca pública que lleva'l so nome y nun pudiendo asistir mandó unes cuartilles qu'empiencen diciendo: "esti conceyu de L.lena, la tierra de mios güelos, la tierra de mios padres, la tierra que guarda nos valles y nos montes los gratos y imborrables recuerdos de la mio infancia"

VITAL AZA,

Poeta y comediógrafu, de gran relevancia sobre too a finales del sieglu XIX; el Conceyu de L.lena foi recopilando la so obra y documentación manuscrita y fotográfica hasta casi completala. El teatru y una de les calles principales de La Pola lleven el so nome. La so forma trescendió hasta los Estaos Unios onde se toma como modelu pa les clases d'español, polo cenciello del so llinguaxe. Esti médicu de vocación lliteraria dexónos una abondosa obra poética, la nomada poesía festiva: "Todo en broma", "Ni fu ni fa", "Broma y más broma", "Pampina", etc y teatral, el teatru cómicu: "El sobrero de copa", "La Praviana", "El rey que rabió",... La so intención yera divertir y entretener.

JUAN MENÉNDEZ PIDAL:

Naturalde Payares, como'l so hermanu Ramón Menéndez Pidal, poeta, investigador, políticu y bibliotecariu. Escribiría la monografía histórico-xeográfica "Lena", que s'inclúi na obra "Asturias" de Bellmunt y Canella.

Jose Manuel Castañón

En plenu sieglu XX, tenemos que mencionar a:

DANIEL GONZÁLES NUEVOS ZARRACINA:

Nacíu nel 1.899, esti maestru y peritu mecánicu, de gran inquietú, dedicóse dafechu a la investigación folclórica. Los sos trabayos espublizáronse en dellos periódicos d'Asturies y Cantabria y na Revista "LENA", anque nunca se recoyeron nuna obra. Estudiosu de la tradición, escribió sobre los zamarrones, los filandones y esfoyaces, los bailles tradicionales asturianos, la danza prima, llegando hasta escribir la zarzuela "Ya se van los quintos madre".

MANOLO PILARES,

Nomatu de Manuel Fernández Martínez, fallecíu en 1.992. Foi mineru, ferroviariu, maestru, poeta, cuentista (Los cuentos de la buena y mala pipa), autor de noveles curties y nos últimos años dedicáu a escribir series de televisión y guiones cinematográficos, llevaos al cine por Fernando Fernán Gómez o Jaime Armiñán: La vida por delante. La vida alrededor o El andén col director Manzano. Viaxeru constante, siempre tuvo uníu a L.lena. El Conceyu recopiló nel llibru entituláu Relatos, tolos cuentos incluyendo dellos inéditos.

JOSE MANUEL CASTAÑÓN DE LA PEÑA:

Fíu predilectu de L.lena, fallecíu en xuno del 2.001. Esti abogáu por devoción y escritor por vocación, viviría ente les dos orielles, exiliándose voluntariamente, al nun tar d'alcuerdu col tratu que se daba a los vecinos de la guerra civil. En tierres venezolanes espublizaría la mayoría de la so obra. Un quixote ensin soldada como él se definía, yera sobre too una bona persona. Nos caberos años de la so vida recibió homenaxes prestosos y tamién se recopiló parte de la so obra en tres volúmenes, destaquen por exemplu: Moletú Volverá, Bezana Roja, Entre dos orillas, Cuba habló conmigo,... Siempre vinculáu a la so tierra, solía pasar temporaes en La Pola. Collaciu de los sos collacios, nunca s'escaeció de L.lena.

JESÚS NEIRA MARTÍNEZ

Nacíu en 1.916, dedicóse a la enseñanza, primero como mayestru en L.lena y más tarde na Universidá d'Uvieo, de la que ta retiráu. Fíu predilectu de L.lena nel 1.981, ye un eminente filólogu y ún de los primeros n'estudiar la llingua asturiana; autor sobre'l primer estudiu sobre la fala en L.lena y fundador de la desaparecía revista Lena y del Concursu Internacional de Cuentos L.lena.

JOSE MARÍA MARTÍNEZ CACHERO,

Anque nacíu n'Uviéu, tá vinculáu en Congostinas onde pasaría llargues temporaes de la infancia. Catedrátcu eméritu de Lliteratura Española pola Universidá d'Uvieo ye quiciabes, el meyor conocedor de la obra de Clarín y autor d'abondes crítiques sobre la lliteratura del sieglu XIX y XX. Habitual collaboraor d'actividaes culturales nel Conceyu de L.lena.

Ramón Menéndez Pidal

Nel terrén periodísticu, destaquen:

GONZALO CASTAÑON

Natural de La Cortina, foi periodista, escritor y políticu. Fundó n'Uviéu la revsita La tradición y en La Habana, La voz de Cuba. Collaboró en dellos periódicos y foi diputáu provicial por L.lena nel 1.866

BERNARDO AZA:

Nacíu en La Pola nel 1.887, dedicóse al periodismu y a la política, fundando nel 1.923 el diariu La Región.

Sicasí, habrá qu'esperar a tiempos más recientes pa poder falar d'esta tradición periodística y sobre too de dos persones que dedicaron toa una vida a esta profesión.

MIGUEL G. LÓPEZ

Cronista oficial de L.lena, que morrió con casi cien años. Escribía en tolos periódicos asturianos y dexaría tres de sí, una saga de periodistes como'l fíu y tamién el nietu.

TINO REBUSTIELLO

Fíu de Miguel G. López, fundador con Jesús Neira de la revista Lena y del Concursu de Cuentos L.lena, plasmaría durante años la vida l.leniza nunos artículos apasionaos como corresponsal. La espublización, fecha pol so fíu De nuestro Corresponsal recueye bona parte del so trabayu periodísticu.

Celso Granda

Tamién nel terrén de la PINTURA el Conceyu de L.lena tein destacaos artistes:

LUIS MENÉNDEZ PIDAL

Hermanu de Ramón y Juan Menéndez Pidal, nació en Payares. Foi profesor na Escuela de Belles Artes y considerérenlu como ún de los grandes pintores españoles con mayúscules y tamién un gran retratista que nun escaeció tampoco'l costumismu asturianu nos sos cuadros.

CELSO GRANDA:

Muertu nel 1.975 foi'l pintor bohemiu por antonomasia, con una prolífica obra de calter tremendista, na que predominen los reos, les procesiones, los paisaxes, tabiernes... La so obra revalorizóse enforma pola so hermana, celebró na galería Boticelli d'Uvieo en 1.974, anque poco pudo disfrutar de la gloria. El Conceyu de L.lena entamó una amuesa antolóxica de la so obra coincidiendo con Les Feries y alquirió delles de les sos pintures pal fondu de la pinapoteca del Conceyu.

FELIZ GONZÁLEZ NUEVO SANTA MARINA:

Graduáu n'Artes y Lletres llegó a pintar en Roma, especializándose na pintura de marines y tamién nel constumismu asturianu de los llabores del campu.

Posiblemente a estos personaxes pudiéremos añadir dellos más: filólogos, investigadores, pintores, deportistes, médicos, músicos, etc como CHUS VALGRANDE (fundador de la estación d'esquí); JUAN ÁLVAREZ (ciclista), ANGEL GONZÁLEZ DE LENA y FERNÁNDO MENÉNDEZ (esquiadores), CESAR CORDERO (médicu), el filólogu XULIO CONCEPCIÓN, el monologuista ANGEL MENÉNDEZ CACHERO (ANXELU), pintores como MARIA ANTONIA SALOMÉ, LAURA ANTOLÍN, MARIA LUISA SÁNCHEZ, ÁNGELES LOSADA, ANTONIO NAVESSO,...