Al prebar la concina l.leniza tenemos el productu del estilu de vida y del trabayu de los vecinos del conceyu. Del trabayu de la tierra abastécense les cocines de patates, fabes, arbeyos (destaquen pola so testura los de Chanos de Somerón), berces, escanda... que valen de complementu a les carnes. Les abondes viesques de castañales faen de la seruenda un tiempu bien prestoso pa tastiar el pote castañes. La llimpieza de los ríos regala pesca a esgaya sobre too de la trucha.

Del gochu presten los embutíos, la mociel.la, el chorizu, el xamón asina como les oreyes,... La carne roxo, derivada del ganáu vacuno, ye bien valorada tamién nesti conceyu orixinaria de les races autóctones: asturiana de los valles o casina. Ven n'otubre a Les Feries y preba'l vienres los callos, pa depués andar de folixa. El cordiru, preparáu a la estaca da pie a una e les romeríes más representatives del conceyu, esta fiesta faise'l primer domingu de xuneto nel Prau L.lagüezos asitiáu en plena Sierra de L'Aramu. La caza tamién xuega un papel importante na gastronomía l.leniza na que se pues tastiar carne de corzu, xabalí, cogornices, perdices,... Nun podemos escaecemos del pitu de caleya y el cabritu con patatines o a la caldereta como parte de los sabores del conceyu.

Toos estos platos acompáñense con pan d'escanda, ún de los productos típicos nun solo d'esta zona sinón de toa Asturies. Too ello regao pol frutu de la mazana, que yá fermentao, danos la sidra.

Como postre podemos escoyer ente los suspiros de Payares, los frixuelos, l'arroz con lleche, les casadielles, los borrachinos...

Toos estos productos puen probase nos restaurantes, sidreríes y chigres de La Pola y del conceyu.