Salimos de La Pola, L.lena pa l.legar a Muñón Fondiru per carretera onde garramos una pista a la izquierda que va al par del Reguiru de Brañal.lamosa. Ente mates de ribera y castaños xubimos al puiblu del mesmu nome.

Dende equí, siempre per pistes forestales, hai  cuestes grandes y zones más l.lanes dende onde son prestoses les vistes del val.le d'El Río Muñón. L.legamos a Ablaneo onde entamamos a baxar pel cordal hasta'l Col.léu La Escrita onde la ruta mos ufierta les meyores vistes del Conciyu L.lena l.legando a ver incluso los montes de Quirós, la Sierra de Navaliigu, el Cordal d'Urbiés,...

Brañal.lamosa

Siguimos pista abaxo per un camín solombriegu, húmedu y embarréu pero ensin dificultá. Cuando ta enriba de Muñón Fondiru la pista divídese, el camín de la izquierda l.lévamos hasta Muñón y el de la derecha l.lévamos per un pedreru hasta'l Barriu de La Crespa en La Pola, L.lena.

>>>>BAXAR RUTA:

Ablaneoast2803.pdf (170KB)

Salimos de La Pola, L.lena pel Barriu La Caleya empobinándonos a La Fuente L'Ablenu. Dende equí, pel camín real, pasaremos pela parte baxa del puiblu de Palaciós, al llau d'un molín que tovía furrula y da serviciu xunto a la Fuente Vieya.

Continuamos hasta la Ermita de La Flor, capilla con inscripciones del S. XV allugá nun preu del mesmu nome. Cruzamos el ríu y xubimos per una pista que mos l.leva hasta un sendiru de piedres que s'adientra nun monte de castañales bien interesante.

Ríu Naredo

Siguimos xubiendo, dexando a la izquierda la crestería de Pena L.larga hasta'l Colláu de Vil.lares. Nesta zona de cabanes podemos contemplar interesantes vistes de la Sierra L'Aramo y la parte alta del Riu Nareo. Vamos garrar una pista que baxa, pasando cerca d'unes mines antigües hasta enllazar cola carretera que vien de Tablao. Poco depués garrando otra vuelta'l camín real que sal a mano derecha, llegamos al Preu La Flor y volvemos a La Pola, L.lena pel camín yá andáu.

>>>>BAXAR RUTA:

Mofusuast6480.pdf (157KB)

Salimos de La Pola, L.lena per un camín que sal a la derecha del campusantu. Metémonos nel monte, onde podemos apreciar los restos del planu por onde baxaba'l carbón que venía en tren dende Morúes. Llegamos a Cuamoros, hoi deshabitáu y xubimos per una camín cascayosu hasta enllazar cola pista que vien de Muñón a Fregadura. Siguimos la pista siempre en dirección oeste, llegando al Mayéu La Escrita onde podemos garrar agua.

Siguimos pela miesma pista hasta'l Mayéu Ablanéu, onde se xunten les pistes que vienen  de Brañal.lamosa. Siguimos p'arriba per un costariplu y l.legamos a una cabana. Na fuente que ta al pie d'ella salimos de la pista y xubimos ente carrascos y matos directamente hacia'l cumal del Cogul.lu.

El Val.le Peral (Área recreativa)

Dende equí baxamos en direción a la área recreativa del Val.le Peral y siguimos pela pista en dirección sur unos 2 km. Equí sal un camín que baxa en mediu del monte hasta Tablao. Siguimos baxando pela carretera hasta Morúes, onde entá hai restos del antiguu cargaderu y namás pasalu garramos el camín a la derecha que nos lleva a la hermita de La Flor. Siguiendo'l ríu pel camín real llegamos a La Pola.

>>>>BAXAR RUTA:

Coguchuast9528.pdf (176KB)

Salimos de La Pola, L.lena escontra San Feliz. Na parte cimera del pueblu sal un sendiru que crucia en dirección sudeste un monte de castañales que nos l.leva enriba del l.lugar El Val.le. Ensin baxar a él garramos la pista que xube hasta La Llana'l monte onde pescamos un camín a la izquierda que crucia un monte pequenu .

Tres una xubida suave l.legamos al cume del Picu Raneru onde tenemos unes vistes precioses de los conceyos d'Ayer, L.lena y Mieres.

La Pola, dende'l Raneru

Siguimos pola cresta en dirección Sur hasta'l cercanu Picu Cumes y depués vamos baxar hasta'l Mayéu Espines. La pista que se alloña en dirección Sur ye una calzada romana llamada Via Carisa, pero nós vamos garrar la que baxa a mano derecha. Baxamos observando los restos de les antigües mines de La Gotera o La Cobertoria hasta'l polvorín onde siguimos la pista asfaltada que nos lleva hasta Columbiel.lo y d'equí a La Pola, L.lena pel paséu a la vera'l ríu.

>>>>BAXAR RUTA:

Raneruast348.pdf (166KB)

Salimos del Aula del Prerománico de La Cobertoria, cruciamos el puiblu d'El Piridiil.lu y xubimos pela pista escontra'l repetidor de TV. Llegamos a Les Col.laes y dexamos la pista que sigue xubiendo pa contra La Carisa pa garrar un camín que crucia la fastera en dirección Este.

Per pista nuevamente percorremos los paraxes de La Gotera y La Mochera pa llegar a la Rasa Navayos después de cruciar un monte perguapu de fayes. Dende esti puntu, siempre pela pista, siguimos xubiendo curva tres curva hasta'l mayéu de L'Insiertu, onde cruciamos con La Via Carisa.

Val.le Felgueras

El descensu pa contra La Cobertoria faise pela pista de xubida hasta la Rasa Navayos. Nesti sitiu privilexiáu  podemos contemplar tol Valle de Felgueras, dende'l Mayéu de Carraceo hasta Santo Cristina. Dende equí garramos un senderu que nos lleva al Mayéu de Bustiello y a la carretera de Felgueras. Merez la pena visitar Felgueras antes de siguir baxando pela carretera escontra Palaciu Felgueras. Dempués de pasar el pueblu garramos el camín real a Santa Cristina, ilesia prerrománica Padremuñu de la Humanidá. Llegamos a La Cobertoria siguiendo pel camín real, al puntu d'entamu la ruta, l'Aula del Prerrománico.

>>>>BAXAR RUTA:

ValleFelguerasast9388.pdf (161KB)

Salimos del Altu de La Cobertoria en dirección  Sur per un senderu que percuerre la divisoria ente L.lena y Quirós. Poco dempués llegamos a la Col.lá de Felguerina onde se xunten dos pistes, siguimos de frente y metémosmos nun monte de fayes y carrascos enormes. Pasamos la collada de La Potrera y siguimos hasta un encruz de caminos onde garramos la pista de la izquierda que mos avera a los restos d'una mina antigua . Dempués d'una  curva pronunciada, sal un senderu a la izquierda que mos dexa  nuna col.lá con una llamarga onde adulces, esquivando los carrascos, xubimos hasta Brañavalera.

Equí podemos desfrutar d'unes vistes espectaculares  del Macizu d'Ubina y del Val.le del Güerna.

Brañavalera

Baxamos al mayéu Brañavalera y garramos la pista que baxa , siguimos hasta atopar una esviación a la izquierda que mos avera a una braña. Dende equí primero un senderu y depués otra pista avéramos a Ronzón y a Sorribas onde per carretera baxamos a La Vega'l Ciigu y a La Pola, L.lena.

>>>>BAXAR RUTA:

Brañavaleraast487.pdf (168KB)

Salimos de Tuíza Riba en dirección Norte hasta'l Quentu'l Visu, col.léu que s'alcuentra ente'l Picu'l Castiel.lu y El Tapinón dende onde se puen contemplar vistes perguapes del macizu d'Ubina y el Val.le del Güerna. Ensin perder altura, cruciamos los altos de La Portiel.la hacia'l siguiente col.léu.

Nesta braña podemos disfrutar de buen agua. A la izquierda vemos praos, monte baxu y viesques de carrascos, a la derecha'l barrancu de Xomezana, per onde nos encaminamos.

Al llegar a Xomezana y Espineo paga la pena dar una vueltina peles caleyes y contemplar dalguna de les sos construcciones. Podemos visitar La Panerona en Xomezana Baxo, un muséu etnográficu pequenu dedicáu a la vida rural, o ver la ruta guapa de los molinos que tienen y visitar dalgún d'ellos qu'entá güei faen les funciones pa les que fueron creaos.

>>>>BAXAR RUTA:

Xomezanaast6345.pdf (158KB)

Salimos del aparcaderu del altu del puertu retrocediendo hasta la divisoria pa llegar a les primeres cuestes. Primero per pistes y depués per un cortafueos que va paralelu a la divisoria, xubimos hasta El Cellón dende onde tenemos vistes del Val.le  Payares.

Vista d'El Brañil.lín dende El Cellón

Entamamos el descensu pela fastera noroccidental en dirección a la Col.lá d'Escuernas y dende equí per un estrechu senderu vamos pasar poles mayaes de La L.loca, La Cantera y Piedrafita onde hai una fonte. Dende equí encarreramos a la Col.lá Muerta onde atopamos la pista del ferrocarril. Tomamos la pista que baxa pa internanos nel Val.le d'Orria onde un senderu llévanos en vertixinosa baxada hasta un depósitu d'agua. Dende equí yá podemos ver la estación de tren de Fierros, final d'esta ruta.

>>>>BAXAR RUTA:

Cellónast891.pdf (155KB)

Dende la Estación d'Esquí de Valgrande-Payares n'El  Brañil.lín garramos la pista que xube pel Val.le del Sol hasta el Cuitu Nigru. Dende equí, primero per pista y llueu al traviés de senderos, percorremos el cordal en dirección Oeste.

Las Ubiñas

A la derecha podemos ver la viesca de Valgrande y la serpenteante autopista d'El Güerna. Yá al pie d'El Negrón pasamos una pequeña pedrera y llegamos a les pindies cuestes finales per una camín marcáu. Dende esta atalaya podemos ver el Val.le del Güerna y el macizu de las Ubinas. El regresu vamos facelo pela mesma ruta.

>>>>BAXAR RUTA:

Negronast9027.pdf (160KB)

Dende la Estación d'Esquí Valgrande Payares en El Brañil.lín vamos garrar cualesquier de les pistes que derruempen el Valle'l Sol hasta la cota cimera. Dende'l Cuitu Nigru siguimos la pista que derruempe l'amplia llomba de Coleo hasta una col.lá onde la pista se divide. Baxamos en dirección Norte ente uzes, xardones y carbayos hasta la pista que vien del túnel d'El Negrón y diríxese a El Rul.lu na N-630. Siguir en dirección Este dellos kilómetros, llegamos a la Reguera del Puertu y pocu dempués garramos un camín que xube hasta la carretera.

Monte de Valgrande

Dende equí pela N-630 hasta l'Altu Payares, onde garramos un senderu hasta'l cumal del Picu La Cerra y siguimos tol cordal ente los llindes d'Asturies y Lleón hasta El Brañil.lín.

>>>>BAXAR RUTA:

Valgrandeast2585.pdf (171KB)