La l.leniza Carmen Mbasogo Edjang cola obra 'El As de Venus' foi la ganadora del IV certame de pintura 'L.lena pinta pola igualdád', un concursu col que la conceyalía de Bienestar Social, Mocedá y Muyer del Conciyu quier promover la igualdá d'oportunidaes. La obra ye la imaxe del cartel conmemorativu del 8 de marzo.

L'artista, de 25 años, explica que la obra presenta a una muyer qu'aguanta na mano derecha tres cartes: una que representa a L.lena col escudu, otra qu'alude a la llibertá sexual y, una tercera sobre'l compromisu a la igualdá de xéneru.

La figura de la muyer ¿s'ensalza sobre un campu d'estrelles con medallones que porten símbolos asociaos a la muyer, la llibertá, la xusticia y el feminismu... El trunfu nuna 'partida' yá sea na vida o nel xuegu, depende de les habilidaes, pero tamién de les cartes que tenemos y escoyemos xugar¿  explicó Mbasogo Edjang.

La conceyal responsable del área, Natalia Ahilagas, destacó la calidá de les obres presentaes, ente les que se topaba la ganadora d'esti cuartu certame. ¿El xuráu escoyó un trabayu que cumple tolos parámetros que pidíamos pa esti concursu. Creo, amás, que define mui bien les reivindicaciones d'esti 8 de marzo¿

La entrega del premiu, dotáu con 300 euros, celebraráse'l 11 de marzo nel teatru Vital Aza dentro del programa d'actos de la conmemoración del Día Internacional de la Muyer, anque nesta edición too supeditao a la evolución de la pandemia.