Ḷḷena, 20 d'abril del 2023

El Conseyu d'Infancia y Adolescencia de Ḷḷena aprobóo nel Plenu celebráu hoi, el documentu definitivu del que va ser II PLAN D'INFANCIA Y ADOLESCENCIA DE ḶḶENA. 

Esi documentu ye frutu del trabayu conxuntu desenvueltu a lo llargo de los últimos meses polos vocales adultos del Conseyu, que representen a centros escolares, AMPAs, entidaes sociales, departamentos municipales y grupos políticos de Ḷḷena . Tamién cuéntase col asesoramientu permanente del Observatoriu de la Infancia del Principáu d'Asturies y d'UNICEF Comité Asturias. Y polos vocales pertenecientes a los Foros d'Infancia y Adolescencia y a los Grupos de Participación Infantil y Adolescente de Ḷḷena, qu'exercen la representación de tola Infancia y la Adolescencia de Ḷḷena.

Esti II PLAN D'INFANCIA Y ADOLESCENCIA supón un pasu más nel compromisu de Ḷḷena coles polítiques basaes nel enfoque de derechos de la infancia y l'adolescencia, y cola iniciativa CIUDAES AMIGUES DE LA INFANCIA d'UNICEF, de la que Ḷḷena forma parte dende que se la reconoció como tal nel añu 2018 y qu'esti añu opta a la renovación d'esi reconocimientu.

Pa que'l II PLAN D'INFANCIA Y ADOLESCENCIA DE ḶḶENA sea definitivu, ha pasar pol Plenu del Conciyu Ḷḷena pa l'aprobación, pero esto yá va ser depués de que se conforme la próxima corporación municipal depués de les elecciones municipales del próximu mes de mayu.