Continuando coles acciones de prevención del tabaquismu y los riesgos asociaos al mesmu, el Conciyu de L.lena, col apoyu de la Conseyería de Salú, desarrollará la campaña "L.lena ensin colillas", que tien como finalidá reducir l'impactu d'estos residuos na contorna y na salú de la población del nuestru conciyu.

Como parte de la mesma, publicaráse un cartel informativu y una serie de vídeos, que sorrayen caún de los mensaxes d'esi cartel. Tamién vanv repartise, ente les persones fumadores, ceniceros portátiles p'ayudales a acostumbrase a tirar les colillas en sitios adecuaos, onde contaminen lo menos posible. 

Les colillas son el residuu contaminante más abondoso y, nel conciyu, puen topase en tolos sitios, si bien, la contorna de los locales d'hostelería tán ente los más castigaos pola presencia d'estos residuos. Por ello, invítase a los responsables d'estos negocios a participar na campaña, colocando'l cartel nos establecimientos y repartiendo dellos ceniceros a la clientela fumadora.

A quien quiera participar van dáse-y estos materiales. Pa ello, puen inscribirse, hasta'l 11 de xuno, pel tf: 985 49 28 60 (de llunes a vienres, de 8:00 a 15:00 hores) o del corréu: pdrogas@aytolena.es