El proyectu pilotu "OVAU: Oficina Virtual d'Accesibilidá Universal del Principáu d'Asturies" tien como oxetivu xeneral impulsar la tresferencia de conocimientos y cultura de l'accesibilidá universal, pa implantar una oficina virtual que sirva de mediu d'apoyu pa impulsar la cultura de l'accesibilidá universal en toles áries; favorecer los medios d'apoyu que faciliten la comunicación clara na ciudadanía; garantizar los derechos de les persones a participar pelos medios telemáticos.

La OVAU compónese d'una unidá d'apoyu, baxo'l paragües de la Estratexa d'Accesibilidá d'Asturies y el Conseyu Asesor de l'accesibilidá, y pola comunidá OVAU, que son toles persones y entidaes que van conformará les redes de la OVAU.

La estratexa de xestión inicial va basase en 3 exes d'acción, coles correspondientes llinies de trabayu. Nestes, van executase más de 24 acciones.

Les exes principales de trabayu son:

• Sensibilización y formación
• Innovación n'accesibilidá
• Gobiernu fácil

El xueves 28 d'octubre celebróse nel Hotel Reconquista d'Uviéu la I Xornada d'OVAU n'Asturies y la Rede de Biblioteques Municipales de Ḷḷena foi ún de los 8 exemplos destacaos de buenes práctiques en materia d'accesibilidá dientro de los conceyos d'Asturies, únicu no tocante a servicios bibliotecarios, y en concretu en accesibilidá física, accesibilidá cognitiva y accesibilidá sensorial, que se correspuenden coles secciones y actividaes distintes que s'ofrecen al respectu: llinguxe de signos, sección en braille y llectura fácil. 

Na exposición montada pa ello podíen contemplase los exemplos de buenes práctiques d'otros servicios y actuaciones de los conceyos de San Tirso d'Abres, Llanera, Cangas del Narcea, Ponga, Somiedu, Castrillón y Llangréu. 

Na mesma participó'l bibliotecariu del Conciyu Ḷḷena, Alberto Fernández.