L'área de Servicios Sociales del Conciyu Ḷḷena, dende la Escuela de Salú y Bienestar, organiza los miércoles d'abril y hasta'l 2 de mayu, un taller dedicáu a les families nes que van tratase, ente otros temes, cómo crear vínculos seguros con fíos y fíes y cómo sentar les bases d'una relación educativa positiva.

Les persones interesaes en participar nesti taller, que ye de baldre, tienen de plazu pa inscribise hasta'l 25 de marzu nel centru de Servicios Sociales de Ḷḷena. Nél va tar presente Lucía Álvarez Blanco, doctora en Pedagoxía y con esperiencia nel trabayu con families, que va abordar conteníos básicos sobre la relación educativa familiar, la importancia de los años de la infancia dende'l puntu de vista evolutivu y educativu, les bases de la disciplina positiva y la comunicación, ente otros.

Esta actividá ta dirixida a madres y padres con fíos y fíes ente los 3 y los 9 años, aunque también van poder participar otres persones encargaes del cuidáu o educación de los nenos y nenes. Les places son limitaes y van reservase per orde d'inscripción.