El miércoles 6 de marzu celebróse'l salón d'actos d'EASMU, n'Uviéu, l'actu d'entrega de les renovaciones como Ciudaes Amigues de la Infancia de 16 entidaes locales asturianes que representen a 21 conceyos. 

D'esta manera, renueven el reconocimientu hasta 2027 los conceuos de: Avilés, Balmonte de Miranda, Candamu, Comarca de la Sidra, El Franco, Llaviana, Ḷḷena , Mieres, Lena Navia, Parres, Piloña, Samartín del Rei Aurelio, Siero, Somiedu, Tinéu y Vegadeo. 

L'actu presidiólu la conseyera de Derechos Sociales y Bienestar del Gobiernu del Principáu d'Asturies, Marta del Arco, acompañada pola directora xeneral d'Infancia y Families, Belén Barrero, y del presidente d'UNICEF Asturies, Ignacio Calviño. 

Con estes 16 renovaciones, Asturies cuenta na actualidá con 43 Conceyos Asturianos reconocío como Ciudá Amiga de la Infancia. Como consecuencia d'ello, 118.320 nenos y nenes asturianes -el 86% de la población infantil total- viven yá en dalgún d'estos conceyos y son yá más de 1.500 los nenos, nenes y adolescentes miembros de grupos de participación infantil, que nes reuniones faen propuestes en temátiques tan diverses como la llucha contra'l bullying, la salú mental o la meyora de parques y instalaciones del Conceyu. 

Tener el reconocimientu de Ciudá Amiga de la Infancia implica pa un gobiernu local compartir una mesma visión, como tamién facer acciones encaminaes a que tou nenu, nena y adolescente pueda disfrutar dafechu de los sos derechos, contar con espacios reales de participación, desenvolvese plenamente na contorna más cercana, nes ciudaes y comunidaes y, a la fin, vivir nuna entornu onde pueda ser nenu o nena, porque'l progresu de la infancia ye'l progresu de toos y toes. Contar con esti reconocimientu ye una inversión na infancia que tien un impactu positivu a curtiu, mediu y llargu plazu, puesto que nun solo tresforma la realidá de la infancia, sinón tamién de tola sociedá. 

Formar parte d'esta rede, polo tanto, implica qu'estos gobiernos locales implementaron la so estratexa d'infancia y tán consiguiendo resultaos reales pa los nenos, nenes y adolescentes de los sos conceyos. Pa ello, cuenten con espacios de participación infantil y adolescente, coordinación ente les diferentes árees, diagnósticu de la situación de la infancia y l'adolescencia nel conceyu, y un plan d'Infancia y Adolescencia acorde a les característiques de cada conceyu.