Ḷḷena, 13 d'abril del 2023.- Les operadores de telefonía móvil, Telefónica, Vodafone y Orange,  anunciaron que nes prósimes selmanes van facer en Ḷḷena'l procesu d'implantación de los servicios de telefonía móvil de nueva xeneración, 4G y 5G, sobre les bandes de 800 y 700 MHz, respectivamente, lo que va permitir disfrutar de conexones móviles d'alta velocidá con una meyor cobertura nel interior de los edificios y mayor estensión xeográfica. 

Pa garantizar la compatibilidá de la tecnoloxía nueva cola televisión dixital terrestre (TDT), Llega700 ye la entidá puesta en marcha polos operadores pa solucionar cualquier afectación na recepción de la señal de televisión.  

El procesu d'implantación ta faciéndose adulces per tola xeografía nacional. Pa comprobar los llugares onde yá tán activos estos servicios, puede consultase esti enllace: https://www.llega700.es/contacto_mapa.php

El despliegue enmácase no establecío nel Real Decretu 579/2019, del 11 d'octubre, a partir que se procedió a la lliberación de les frecuencies ente 694 y 790 MHz (canales 49 al 60 d'UHF) qu'hasta entós utilizábense pa la recepción de la Televisión Dixital Terrestre, procesu tamién conocíu como Segundu Dividendu Dixital. A partir d'entós, eses frecuencies asignáronse a les operadores de telefonía móvil pa dar servicios de telefonía móvil de nueva xeneración.

Principales ventaxes: más y meyor cobertura 

Cola rede móvil nueva abrióse la puerta a servicios y aplicaciones innovadores , amás de proporcionar meyores significatives tanto na velocidá de descarga, como d'unviu de datos (semeyes, música o conteníos audiovisuales d'alta definición) o permitir sacar el máximu partíu a aplicaciones online, como los videoxuegos.  

La rede de telefonía móvil de nueva xeneración introduz dos meyores fundamentales. La primera ye la solvencia de los diversos problemes relacionaos con orografíes complicaes presentes na xeografía española onde tradicionalmente fallaba la cobertura. La segunda, ye la gran penetración en zones interiores de los edificios.

La nueva xeneración tamién facilita la introducción de servicios nuevos nel área empresarial y de les alministraciones públiques, como aplicaciones empresariales en movilidá con altu conteníu multimedia o l'usu de la videollamada, ente otros.

Amás, la mayor cobertura qu'algama'l despliegue nes bandes de 700 y 800 MHz va meyorar el serviciu nel interior d'edificios y va ser la banda que permita esperder xeográficamente'l serviciu de forma eficiente. 

Garantizando la compatibilidá de la rede móvil de nueva xeneración y la TDT

Llega700 ye la entidá xestora encargada d'ofrecer los servicios que van garantizar la compatibilidá ente la puesta en marcha de la emisión móvil 4G y 5G nes bandes de 800 y 700 MHz, respectivamente, y la recepción del serviciu de TDT. 

Pa garantizar esta compatibilidá, Llega700 da a la ciudadanía una serie de servicios gratuitos qu'inclúi un procedimientu correctivu depués del encendíu de les estaciones, pol que llega700 va encargase d'atender a les persones usuaries afectae xestionando y resolviendo posibles afectaciones ensin coste negún. 

Pa xestionar estos servicios, púnxose a disposición de la ciudadanía un teléfonu d'atención gratuitu (900 833 999) y una páxina web www.llega700.es

Más información: 

prensa@llega700.es
@llega700