Ḷḷena recibe una subvención de daqué más de 11.800 euros pal Teatru Vital Aza

El Gobiernu del Principáu d'Asturies, al traviés de la Conseyería de Cultura, Política Llingüística y Deporte, aprobó la concesión d'una subvención de 11.872 euros al Conciyu Ḷḷena pal proyectu de “modernización d'iluminación y audiu del Teatru Vital Aza”.

Esta ayuda, enmárcase na convocatoria de subvenciones a proyectos de modernización y xestión sostenible de les infraestructures escéniques y musicales. El proyectu del Conciyu contempla la sustitución de la iluminación escénica por focos con tecnoloxía LED, la modernización de los sistemes de soníu col cambio de la mesa de mezques analóxica por otra dixital, como tamién dello aparataxe auxiliar d'iluminación y audiu. Too ello enfocao a la meyora de la eficiencia enerxética, la dixitalización y la modernización de los equipos de control.

La financiación d'esta convocatoria procede del Plan de Recuperación, Tresformación y Resiliencia, y insértase nel apartáu de "Revalorización de la industria cultural", col oxetivu de tresformar y modernizar infraestructures anticuaes d'artes escéniques y musicales y facer sostenible la xestión.

Financiáu pola Unión Europea - Next Generation EU