El Conciyu L.lena, dende la conceyalía de Bienestar Social, Mocedá y Muyer, formará a personal voluntario pal puntu lila. La iniciativa, que va celabrase'l próximo 31 de marzo nel hotel d'Asociaciones, cuenta con places limitaes y destínase a persones ente los 16 y 30 años.

La conceyala de Muyer, Natalia Ahilagas, explicó que nel casu de que menores de 18 años quieran participar nesta formación, que corre a cargu de l'asociación Xurtir, deberán contar cola autorización familiar. Amás, a los participantes va entregáse-yos certificación de la formación.

Durante la xornada, que va ser l'últimu día de marzo ente les 16,30 y les 20,30 hores, trataránse dellos temes pa que los voluntarios puedan, a posteriori, facilitar ayuda y informar a toles persones que s'acerquen al puntu lila que se va instalar pa les fiestes. Ente otros qué facer si se presencia o son conocedores d'una situación de violencia sexual.

Esta actividá ta cofinanciada pola conceyalía de la Muyer y la Secretaría d'Estáu pola Igualdá, dientro del Pactu contra la Violencia de Xéneru.