El Serviciu de Normalización Llingüística del Conceyu de Ḷḷena entama dientro del circuitu Autores nel Camín de la Conseyería de Cultura, Turismu y Política Llingüística, un alcuentru col ganador del premiu de poesía Xuan María Acebal 2020, Alejandro Fernández-Osorio na Casa de Cultura de La Pola, esti xueves 21 a les 19 hores.

L'actu tien amás un bon componente emotivu por ser l'escritor del llugar de Viḷḷayana. L'alcuentru, que va tar presentáu pol conceyal de Cultura, Educación y Política Llingüística David Suárez, va recorrer la trayectoria lliteraria del autor de Ḷḷena.

Alejandro Fernández-Osorio, ye llicenciáu en psicoloxía pola Universidá de Salamanca y Especialista en Teoría y Psicoterapia Psicoanalítica, Máster n'Estudios Lliterarios pola Universidá Complutense de Madrid. El primer poemariu publícalu nel 2008 La exactitud al instante , nel 2012 gana'l premiu Asturias Xoven de Poesía con Frontería. Magaya ye'l últimu poemariu que tien publicáu nel 2014. La obra cola que gana'l Xuan María Acebal, tovía non publicáu, ye Tayu.

Dende'l Serviciu de Normalización va facese una donación del poemariu Magaya a los centros escolares d'ESO y bachilleratu p'acercar la obra del poeta de Ḷḷena a los y les estudiantes.