Estas en:

Historia y personaxes

Historia del municipio

La presencia del home nel territoriu de L.lena constátase dende'l neolíticu, tal y como amuesen los yacimientos mineros de Rospaso y la necrópolis megalítica de L'Alto La Cobertoria. L'estratéxicu asitiamientu xeográficu del conceyu de L.lena como "Puerta d'Asturies" marcó'l trescurrir históricu del territoriu.
 
La Vía Romana de La Carisa, formando parte del camín de la Ruta de la Plata, pue tomase como primer episodiu d'esta secuencia histórica, siendo esti camín, posiblemente d'orixe prerromano, una de les víes de penetración de les lexones romanes n'Asturies, que llegaron incluso a establecer un campamentu nel denomináu Castiil.lu de La Carisa. Niciu tamién de la ocupación romana ye la villa de Mamorana a la que pertenez un interesante mosaicu, datáu n'época baxoimperial (sieglos IV y V), hoi custodiáu nel Muséu Arqueolóxicu d'Asturies.

La monarquía asturiana tamién dexó la so buelga nel conceyu cola ilesia prerrománica de Santa Cristina de L.lena, declarada Padremuñu de la Humanidá en 1985, llevantada a mediaos del sieglu IX dientro del periodu ramirense del arte asturianu. Sícasí, a pesar de contar con tal ilustre testigu de la historia pocos son los datos conocíos sobre l'alta Edá Media nel conceyu sacante la esistencia de centros monásticos pequeños y l'articulación del espaciu en dos territorios definíos pelos valles del Payares y el Güerna. Yá nel sieglu XII asistimos a la consolidación de les estructures feudales cola formación de los grandes dominios del monasteriu de Santa María d'Árbás y la Ilesia d'Uvieo, que van contar con estratéxiques heredaes na zona, como los cotos de Payares y Campumanes bien importantes pal tráficu comercial. Precisamente ye nesti momentu cuando nuevamente la naturaleza de sitiu de pasu del conceyu de L.lena vuelve a ponese de manifiestu al atravesalu pel ramal del Camín de Santiago que dende Lleón llevaba a Uvieo pel puertu de Payares pa responder al dichu popular que diz "quien va a Santiago y non al Salvador visita al criáu y dexa al Señor". Una vía de comunicación que facilitaba non solo'l pasu de pelegrinos, pa los que se construyeron albergues y hospitales, sinón tamién de comerciantes y mercancíes dende la costa asturiana a la Meseta.

En 1266 el rei Alfonso X el Sabio dientro de la so política de repoblación otorga la Carta Fundacional de la Puebla / La Pola col fin d'establecer na zona un centru económicu y alministrativu organizador del poblamientu rural de la zona. La nueva "Pola" dotóse entós d'un abondoso arrabalde nel que s'integraron dellos territorios qu'incluía los actuales términos de los conceyos de L.lena y Mieres, polo que se conoció como El Conceyón, concediéronse-y los privilexos del Fueru de Benavente y favoreciósela cola instauración d'un mercáu selmanal.

Dende la fundación de La Puebla y l'arrabalde les tensiones ente'l poder conceyil y los dominios señoriales de la Mitra (el cotu de Payares y Campumanes) fueron constantes dada la situación estratéxica d'estos llugares nes rutes comerciales y la riqueza de les viesques y pastos. Los conflictos ente dambes instituciones allargáronse hasta mediaos del sieglu XVIII cuando finalmente producióse la unificación alministrativa axuntando los territorios de les xurisdicciones eclesiástiques al conceyu de L.lena qu'algamó entós el so mayor desenrollu. Foi precisamente a finales d'esta mesma centuria cuando, col respaldu de Xovellanos y Campomanes, el puertu de Payares s'escoyó como principal pasu de la cordillera Cantábrica nes comunicaciones cola Meseta, dando empiece les obres de la carretera nel 1771, magar nun s'acabare hasta sesenta años depués, nel 1834.

Los sieglos XVIII y XIX fueron tiempos d'axitación y cambios. En 1809 les tropes napoleóniques entraron n'Asturies pel puertu de Payares, llegando a la capital del conceyu onde se dieron disturbios violentos. En 1836 pola Real Orde de 14 d'abril El Conceyón llega al so fin cola creación del conceyu de Mieres escindíu del de L.lena, qu'algamó nesi intre la configuración territorial que caltién na actualidá. Esta segregación, llevada alantre non ensin rocees, llevó a una notable tresformación pa La Pola, que vio menguaes les funciones alministratives centralizadores a favor de la villa de Mieres que cada vez tenía más fuerza. El desenrollu y la industrialización llegaron entós al conceyu tresformando les, hasta entós, formes de vida tradicionales, eminentemente agrícoles y ganaderes. La siderurxa, la minería y la inauguración del ferrocarril pel puertu de Payares, una de les llinies más problemátiques d'España, truxeron al conceyu aires nuevos de progresu y les idees del movimientu obreru.

La Revolución del 34 y la Guerra Civil tuvieron otra vuelta nel conceyu de L.lena ún de los principales escenarios dientro nel panorama asturianu. El puertu de Payares, de gran importancia estratéxica, fizóse bien llueu como oxetivu primordial de les fuerces nacionales, sicasí, la mayor parte del conceyu de L.lena, enmarcáu na zona lleal a la República, nun pasó a manes nacionales hasta otubre de 1937. Acabada la Guerra Civil l'actividá minera convirtióse en motor de la economía del conceyu, siempre apoyada pola ganadería y agricultura de subsistencia, hasta que la crisis del sector nos años 70 relegáronla a una actividá residual.Actualmente les comunicaciones, la industria y el sector servicios ocupen a la mayoría de los sos habitantes, ensin dexar de llau sectores tradicionales como la ganadería.

 

Personaxes ilustres del conciyu de L.lena

Vital AzaEn casi toles époques hai personalidaes vinculaes de dalguna forma al Conceyu L.lena, figures que destacaron en delles facetes (militares, políticos, escritores, pintores, investigadores, músicos,...); bien por nacer o vivir temporaes equí o bien polos llazos familiares o afectivos. 
Na Edá Meda yá se citen dellos personaxes que participaron en distintes guerres como, RAMIRO FERNÁNDEZ LOBO y HERNÁN PÑEREZ DEL PULGAR, al llau de los Reis Católicos na conquista de Granada; el capitán de navíu GONZALO BAYÓN na conquista de La Florida y JUAN DE LLANES nes campañes del Gran Capitán.

 

 

Nel sieglu XVIII destaca Francisco Antonio Bernaldo De Quirós y Benavides, que lluchó al llau de Felipe V, pero sobre too tien de resaltase la so faceta lliteraria, posiblemente foi'l primer poeta de L.lena qu'escribió en llingua asturiana, y hasta'l propiu Feijoo alábalu. Si bien desconocemos si nació nel conceyu de L.lena, sí sabemos que vivió en La Pola, ente finales del sieglu XVII y entamos del XVIII. Solamente se conservó una mínima parte de la so obra recoyida en Poesías selectas en dialecto asturiano, Uviéu 1839.
 Tamién hai que facer mención a FRANCISCO BERNALDO DE QUIRÓS Y BENAVIDES, escritor y políticu nacíu en La Pola a finales del sieglu XVIII, miembru de la Xunta Xeneral del Principáu y representante d'Olloniego y L.lena, sobre too en temes agropecuarios.

Felix G. Nuevo SantamarinaHubo un grupu abondose de l.lenizos, sobre too del Valle del Güerna, que nos sieglos XIX y XX, sobresalieron na carrera eclesiástica, sobre too dominicos. Ente los más conocío cabe citar a: Fernando Blanco Lorenzo, obispu d'Ávila y Valladolid, el Padre Barbado, obispu de Salamanca, el Padre Ramón Sarabia, el Padre Manuel Suárez, o el Padre Gafo, que llegó a ser diputáu a les Cortes na II República.

Nel campu de les lletres, hai una serie de personalidaes destacaes como:

Ramón Menéndez Pidal,
magar que naciera n'A Coruña, yera oriundu de Payares. Ilustre filólogu de reconocíu prestixu mundial siempre tuvo vinculáu a L.lena. Asina nel 1946  inaugurábase la biblioteca pública que lleva'l so nome y nun pudiendo asistir mandó unes cuartiyes qu'entamen diciendo: "Este concejo de Lena, la tierra de mis padres y de mis abuelos, la tierra que guarda en sus valles y en sus montañas los gratos e imborrables recuerdos mi infancia..."

Vital Aza,
poeta y comediógrafu de L.lena de gran relevancia sobre too a finales del sieglu XIX, cuya obra y documentación manuscrita y fotográfica foi recopilando'l Conciyu L.lena hasta casi completala. El teatru y una de les calles principales de La Pola llevan el so nome. La so fama trescendió hasta los Estaos Uníos onde se toma como modelu pa les clases d'español, polo cenciello del so llinguaxe. Esti médicu de vocación lliteraria dexónos una abondosa obra poética, la llamada poesía festiva: Todo en broma, Ni fu ni fa, Broma y más broma, Pamplina, etc. y teatral, el teatru cómicu: El sombrero de copa, La Praviana, La rebotica, El rey que rabió ,etc. La so intención yera divertir y entretener.

Juan Menéndez Pidal,
oriundu de Payares, como l'hermanu Ramón Menéndez Pidal, poeta, investigador, políticu y bibliotecariu, escribiría la monografía histórico-xeográfica L.lena, que s'incluye na obra Asturias de Bellmunt y Canella.

José Manuel CastañónEn plenu sieglu XX, tenemos que mencionar a:

Daniel González-Nuevo Zarracina,
nacíu nel 1899, esti mayestru y Périto Mecánicu, de gran inquietú, dedicóse dafechu a la investigación folclórica, los sos trabayos publicaríalos en dellos periódicos d'Asturies y Cantabria, y en La Revista Lena, anque nunca se recoyeran nuna obra. Estudiosu de la tradición, escribió sobre los zamarrones, los filandones y esfoyaces, los bailles tradicionales asturianos, la danza prima, llegando incluso a escribir la zarzuela Ya se van los quintos madre.
 

Manuel Pilares,
Nomatu de Manuel Fernández Martínez, fallecíu en 1.992. Foi mineru, ferroviariu, maestru, poeta, cuentista (Los cuentos de la buena y mala pipa), autor de noveles curties y nos últimos años dedicáu a escribir series de televisión y guiones cinematográficos, llevaos al cine por Fernando Fernán Gómez o Jaime Armiñán: La vida por delante. La vida alrededor o El andén col director Manzano. Viaxeru constante, siempre tuvo uníu a L.lena. El Conceyu recopiló nel llibru entituláu Relatos, tolos cuentos incluyendo dellos inéditos.
 
José Manuel Castañón de la Peña:
Fíu predilectu de L.lena, fallecíu en xuno del 2.001. Esti abogáu por devoción y escritor por vocación, viviría ente les dos orielles, exiliándose voluntariamente, al nun tar d'alcuerdu col tratu que se daba a los vecinos de la guerra civil. En tierres venezolanes espublizaría la mayoría de la so obra. Un quixote ensin soldada como él se definía, yera sobre too una bona persona. Nos caberos años de la so vida recibió homenaxes prestosos y tamién se recopiló parte de la so obra en tres volúmenes, destaquen por exemplu: Moletú Volverá, Bezana Roja, Entre dos orillas, Cuba habló conmigo,... Siempre vinculáu a la so tierra, solía pasar temporaes en La Pola. Collaciu de los sos collacios, nunca s'escaeció de L.lena.
 
Jesús Neira Martínez
Nacíu en 1.916, dedicóse a la enseñanza, primero como mayestru en L.lena y más tarde na Universidá d'Uvieo, de la que ta retiráu. Fíu predilectu de L.lena nel 1.981, ye un eminente filólogu y ún de los primeros n'estudiar la llingua asturiana; autor sobre'l primer estudiu sobre la fala en L.lena y fundador de la desaparecía revista Lena y del Concursu Internacional de Cuentos L.lena.
 
José María Martínez Cachero,
Anque nacíu n'Uviéu, tá vinculáu en Congostinas onde pasaría llargues temporaes de la infancia. Catedrátcu eméritu de Lliteratura Española pola Universidá d'Uvieo ye quiciabes, el meyor conocedor de la obra de Clarín y autor d'abondes crítiques sobre la lliteratura del sieglu XIX y XX. Habitual collaboraor d'actividaes culturales nel Conceyu de L.lena.

María Antonia Solomé Fernández Martínez,

Nació en La Vega'l Ciigu, el 16 d'avientu de 1934. Fía de José Fernández Delgado y María Martínez Ortea. A los pocos años la familia afita la so residencia en La Pola, L.lena, onde empezó los sos primeros estudios. La so vocación pola pintura llevóla a treslladase a Italia, onde cursó estudios na Escuela Superior de Belles Artes de Roma, onde llogró la llicenciatura en 1960. Darréu especializóse en Museoloxía y Comunicación Visual pola Universidá de Florencia, convalidando estos estudios na Universidá Complutense de Madrid. Los sos primeros pasos artísticos nos años 60 afigurar nuna pintura figurativa, de sólida construcción profesional, anque como ella mesma dicía, nunca foi convencional. Nos años 70 viaxó y trabayó en distintos llugares d'Italia, en Paris, asina como n'América o Xapón; esperimentó con nuevos materiales y la so pintura fíxose más informal y más rica no que tien que ver con temes espresivos. Estes esperiencies resultáron-y bien enriquecedoras y desaguaron no qu'ella mesma denominó "estructuración múltiple del espaciu", una pintura xeometrizante nes formes estructurales que pretende espresar el mundu de les galaxes, l'universu. Utiliza técniques mistes, pulverizaciones, esmaltes, olios y sobremanera colores fríos.

Les sos obres espusiéronse en, Roma, París, Nimes, Madrid, Llión, Xixón, Uviéu... y formen parte de colecciones de países como, Italia, Francia, Xapón, Estados Xuníos, Canadá, Brasil,...

En 1986 presentó una esposición na Caxa d'Aforros d'Asturies, onde amosábense pieces representatives de tola so trayectoria: pintures compuestes a partir de manches espardíes y pieces escultóriques inspiraes n¿oxetos cotidianos. Amás de la pintura y la escultura, trabayó'l mosaicu.

Ente los premios y reconocimientos recibíos figuren: el Premiu "Vïa Margutta" (Roma, 1959), la Medalla de Plata "Ciudá de Roma",1960; el Premiu del "Conseyu Xeneral del Sena", Ayuntamientu de París, 1965; el nomamientu d'asturianu del añu en pintura, en 1965, de La Nueva España, a parte de diplomes y nomamientos d'honor de delles ciudades italianes, nes que pasó parte de la so vida artística.

Su vida finó en La Pola, L.lena, el día 8 de mayu de 2008.