El Conciyu de L.lena abre, dende hoi y hasta'l próximu 10 de mayo, el periodu pa la recepción de les solicitúes pa los interesaos en participar nuna edición nueva del programa L.lena Contrata. En total sedrán 15 persones que se contratarán pol plazu de seis meses como peón/operariu de Servicios múltiples.

La llista provisional d'excluíos va publicase'l día 13 de mayo y les reclamaciones podrán facese hasta'l día 17 del mesmu mes. La llista definitiva de propuesta de contratación va conocese'l 23 de mayo. El sistema d'accesu sedrá concursu.
Al igual que n'ediciones anteriores, la financiación sedrá dafechu del conciyu. De conformidá a lo dispuesto nel artículu 59 de la Llei 7/2007 va reservase un 7 por cientu de los puestos convocaos pa persones con discapacidá igual o superior al 33 por cientu, siempre que superen el procesu selectivu.
Esta contratación ta destinada a persones integrantes d'unidaes familiares con un mínimu de dos miembros que s'atopen en situación de desempléu y onde la media de retribuciones mensuales de tolos miembros de la unidá familiar nel 201 nun superara'l 75 por cientu del IPREM mensual establecíu pal añu referíu. (n'ediciones anteriores pidíase'l 30 por cientu).
Como novedá, nesta edición les persones mayores de 57 años tan llibres de la condición de formar parte de les unidaes familiares, de polo menos dos miembros, siempre qu'acrediten una antigüedá nel padrón del Conciyu d'un mínimu de dos años como unidá unifamiliar.
Pa concurrir al procesu de selección, los interesaos han presentar la instancia debidamente cumplimentada; fotocopia del DNI o documentu acreditativu; declaración responsable, cumplimentada y formada; certificáu en vigor acreditativu de discapacidá igual o superior al 33 por cientu nel casu d'optar a la reserva pa persones con discapacidá, y documentación acreditativa de la percepción d'ingresos.
Según recordó la teniente d'alcalde y conceyala de Personal del Conciyu de Lena, Gema Álvarez, esti programa de L.lena Contrata destínase a persones con pocos o nulos recursos. Amás, l' incrementu de presupuestu va permitir contratar a lo llargo del añu a 30 families envede 24 como hasta agora. Recordó que con esti sistema de contratación, opten a un empléu per un periodo de seis meses y, n'acabando, puen acceder dos años más a la ayuda familiar.