Nel Plenu del 28 de xinero del 2016, aprobóse por unanimidá la propuesta d'adhesión de L.lena a la Estratexa de Promoción de la Salú y Prevención nel Sistema Nacional de Salú (EPSP).

Asina, asúmese'l compromisu de desenvolver nel nuestru conciyu esta iniciativa del Ministeriu de Sanidá, Servicios Sociales y Igualdá, que tien como finalidá fomentar la salú y el bienestar de tola población, promoviendo entornos y estilos de vida saludables, qu'ayuden a ganar años de vida en buena salú, previniendo enfermedaes, lesiones y discapacidá.

Los factores a abordar de manera prioritaria pa meyorar la salú de la nuestra población son el sedentarismu, la mala alimentación, el consumu de tabacu, el consumu nocivu d'alcohol, les lesiones y el malestar emocional, yá que tán relacionaos coles enfermedaes cróniques, que son la causa más importante de mortalidá y mala salú, siendo prevenibles. 

L'ámbitu local considérase un entornu esencial pa ganar salú y bienestar nel conciyu. Nesti sentíu, la Estratexa ye un marcu buenu pa integrar el trabayu que yá se ta faciendo en L.lena, pa reforzalu y amplialu potenciando'l ´llabor coordináu de tolos sectores implicaos y la participación de la ciudadanía.

L'adhesión de L.lena implica reconocer el papel importante que los gobiernos locales tienen na salú de la población, tenela en cuenta en toles polítiques y promovela cola participación de toles aries municipales y de tola comunidá.

Les actuaciones que se van poner en marcha nuna primer fase céntrense en:

• Facilitar información de calidá pa que toles persones puedan desenvolver estilos de vida saludables.
• Impulsar el trabayu conxuntu y coordináu de tolos sectores en salú: aries municipales, ámbitu educativu y social, ámbitu sanitariu. Pa ello créase la Mesa de Coordinación Intersectorial, integrada  por personal técnicu de dellos departamentos municipales, que s'ampliará a representantes d'otros sectores de la comunidá. Les funciones sedrán adaptar les propuestes de la Estratexa al nuestru conciyu, facer el seguimientu y evaluación del so desenvolvimientu; ayudar a que les polítiques y acciones del conciyu tengan un impactu positivu na salú y el bienestar de la población.
• Ellaborar un Mapa de Recursos comunitarios que puen usase pa meyorar la salú y el bienestar de la población que vive en L.lena. Dalos a conocer y potenciar la so utilización. 
• Estimular la participación vecinal nel desenvolvimientu de la Estratexa.

Nesta fase van focalizase les actuaciones na población infantil, nel embaranzu y lactancia y na población adulta, poniendo especial atención a los mayores de 70 años, considerando la so mayor vulnerabilidá y riesgu de dependencia.

Además de continuar con programes y actividaes como los relacionaos col tabacu y l'alcohol, actividá física, alimentación y parentalidá positiva, propónense proyectos nuevos ente los que ta la creación d'una escuela municipal de salú y la puesta en marcha de rutes por dellos sitios del conceyu.

El xueves 23 de xuno va constituirá la Mesa de Coordinación Intersectorial.