El próximo sábado 28 de mayo, cerca de 200 xinetes procedentes de dellos puntos de la xeografía asturiana van dase cita en Carabanzo pa entamar la VII Ruta a Caballu pela Vía Carisa organizada pol Club Ecuestre de Carabanzo. Ente les 08:30 hores y les 09:30 hores los participantes han acreditase nel local de l'asociación y va entregáse-yos un vale col que van tener derechu a un bollu y a la comida popular que se celebrará n'acabando la ruta nos alredores de la "Llana la Terruca", al llau de la capilla de "La Santa". Depués de recorrer 30 km a caballu emulando a los antepasados astures y de dar cuenta de la comida ganada pol esfuerzu, los xinetes van disfrutar d'una tarde animada con baille hasta'l cierre de la edición. Como n'ediciones anteriores, los xinetes de mayor y de menor edá van galardonalos nel trescursu de la xornada.

    La organización d'esta ruta a caballu cumple siete años dende que nel 2010 el Club Ecuestre de Carabanzo decidiese promocionar el valor históricu y cultural de la Vía Carisa como recursu turísticu pa desenvolver actividaes deportives complementaries al senderismu y a la bicicleta de monte. La idea del Club Ecuestre de Carabanzo ye aprovechar tol potencial qu'ofrecez la Vía Carisa como iconu turísticu pa la captación de visitantes y pa la diversificación económica de la zona.

    La respuesta del públicu foi un éxitu hasta la fecha: la ruta evolucionó mui positivamente dende la primer edición, llegando a cuadruplicase el númberu de participantes na actualidá, que pasaron del mediu centenar de la primer edición nel 2010 a los casi 200 xinetes que participen na edición del 2016.

   Esti eventu de l'asociación deportiva naz amás, como complementu a l'actividá que desenvuelve'l restu del colectivu asociativu del llugar de Carabanzo col oxetivu de promocionar y esparder el padremuñu históricu del conceyu alredor de la Vía Carisa.

   Como organizadores de la  VII Ruta a caballu pela Vía Carisa, el Club Ecuestre de Carabanzo, quier agradecer la collaboración y l'apoyu ofrecíu por: Conciyu de L.lena, Caja Rural, Asociación de Mujeres "La Carisa", Asociación de Mejoras de Carabanzo, Asociación de Pensionistas "San Román" de Carabanzo, Asociación de Jóvenes de Carabanzo, Apartamentos rurales La Caleya, Comercio de Félix, Bar La Caleya, Informática Valle de Turón, H.G. Distribuciones y Bar Belén.