Nel Plenu del Conseyu participaron representantes de centros escolares, d'asociaciones de madres y padres, d'entidaes que trabayen con infancia y adolescencia, de los diferentes departamentos municipales, de los diferentes grupos políticos y, por supuestu, la representación de los Foros d'Infancia y Adolescencia y de los Grupos de Participación de L.lena.

La Presidenta dio cuenta de les actividaes más destacaes dende'l Plenu anterior celebráu'l 26 de setiembre del 2018 y informó a los miembros del Conseyu del reconocimientu otorgáu a L.lena como Ciudá Amiga de la Infancia na última convocatoria d'esi certame avaláu por UNICEF ente otres instituciones.

A continuación tomaron la palabra los y les representantes de los Foros d'Infancia y Adolescencia y de los Grupos de Participación, que treslladaron a la Presidencia les sos esmoliciones, propuestes y peticiones, y informaron a los presentes del trabayu que ficieron dende l'anterior Plenu.

Posteriormente, nel turnu de los vocales del Conseyu, tomó la palabra la representante del P.S.O.E. que na so intervención, amás de felicitar a quien forma parte de los Foros y de los Grupos de Participación pol trabayu y poles propuestes, propúso-yos que se sumaran a la so demanda pa trabayar de forma decidida na eliminación de barreres arquitectóniques nel nuestru conciyu.

P'acabar el Pleno, acordáronse les llinies de trabayu que pal 2019 pondrán en marcha les Comisiones de Trabayu del Plan d'Infancia y Adolescencia de L.lena.

Depués del Plenu del Conseyu, na entrada del Conciyu, fízose un actu cenciellu de descubrimientu de la placa qu'acredita a L.lena como Ciudá Amiga de la Infancia, nel que tomaron la palabra l'Alcaldesa y un representante de la Infancia y l'Adolescencia de L.lena.

Imágenes