FALLU DEL XURÁU DE LA LXI EDICIÓN (Añu 2024)

Joaquín Correa Barco, col cuentu tituláu 'La Grieta', foi escoyíu por unanimidá del xuráu ganador de la LXI edición de 'Cuentos Ḷḷena' dotáu con un premiu de 3.000 euros. El galardón va entregase nun actu institucional que va celebrase nel salón de plenos de la Casa Conciyu'l viernes, 5 d'abril, a les 13,30 hores.

Nesta ocasión, y debío a que s'atopa fuera d'España, la intervención del ganador va facese por videoconferencia, anque va visitar el conceyu próximamente pa recoyer el premiu. Na mesma, y como ye habitual, va lleer el relatu  escoyíu pol xuráu. La entrega coincide col entamu de les fiestes de La Flor

Correa Barco ye llicenciáu en Derechu y ye aficionáu a la lliteratura dende la mocedá, anque retomó la escritura nel 2018. Ye autor de noveles como “La sangre de la tierra”; “Paisaje desde un tren en movimiento”; “La U.R.N.A.”; “Mensaje sobre mi lápida: sin aliento” y “Terral” (Premiu de Novela Valdemembra 2022). Tamién recopilaciones de relatos como “Materia de sueños”; “Llamadas a cobro revertido” (Premiu de Cuentos Ciudad de Coria de la Diputación de Cáceres 2020) y “La conservación de la violencia” (Premiu de Cuentos Manuel Llano del Gobiernu de Cantabria 2021).

Amás tamién cuenta nel palmarés con otros reconocimientos como son el Premiu de Cuentos “Gabriel Miró” en 2021; el Premiu Otoño “Villa de Chiva” de Creación Literaria 2022 pol llibru de relatos “Nota de suicidio: manual de instrucciones” (finalista tamién del XXXIV Premiu “Torrente Ballester” de narrativa) y el Certame de relatos Rafael González Castell pol llibru de relatos “El incesante olvido”.

Más info: Joaquín Correa Barco

El certame, que celebra esti añu'l 61 aniversariu, recibió un total de 362 orixinales, la mayoría son de procedencia española. Esti añu recepcionáronse trabayos de Perú, Chile, México, Uruguay y Arxentina.

Tamién llegaron orixinales d'USA, Francia, Alemania y ún d'Israel. Nel casu d'España, y según el matasellos de los paquetes recibíos, provienen d'A Coruña,Albacete, Almería, Barcelona, Bilbao, Burgos, Cáceres, Cádiz, Ciudad Real, Granada, Gran Canaria, Lleón, Lleida, Logroño, Madrid, Málaga, Mallorca, Menorca, Murcia, Palencia, Salamanca, Santander, Sevilla, Soria, Tarragona, Tenerife, Teruel, Valencia, Vitoria, Zamora y Zaragoza.